العير رحمه الله ..والزلامي.!

[نايف بن صنهات]

محاوره بين المرحوم عبد الله العير و رشيد الزلامي
اللي أذكرها أنها كانت في حفل في الدوادمي
وبحثت عنها صوتيه لكن للأسف ماوجدتها



عبدالله العير

سلام يا اصحابنا اللي جيتهم بالوعد=وانا ليا جتني الدعوات لبيتها
اصفى سما نجد لابارق ولامن رعد=وانا لمحت المزن ورعوده اوحيتها

رشيد الزلامي :

الله يحييك ترحيبٍ بليا عدد=قدمك رجالٍ ترحبك ليا جيتها
بس المصيبه تجيهم وانت مامعك احد=قامت بك الارض واشتغلت عفاريتها

عبدالله العير:

البارحه يارشيد وليت الاول بعد=وشلون حال الجماعه يوم مريتها
حنّا طراقي ولاحنّا من اهل البلد=لكن دعوتك هذي تعرف بويتها

رشيد الزلامي :

ان كان تنشد جماعتنا بحال السعد=ومطير ماهي على الدرب وتعديتها
وش رايكم في عجوز بليس جابت ولد=واليا اسر الله ضحكتك وبكيتها

عبدالله العير :

الله ولا النشده اللي تاليتها نكد=وشلون موجتك للمطران فريتها
اللي عطتك البريره وانت وسط المهد=قالوا لي انك بعد شيّبت جازيتها

رشيد الزلامي :

الله يعلم رشيد وقصده اللي قصد=مطير من قبل جيراني وحبيتها
لاتحفر المقبره يطبق عليك اللحد=واللي عطتني بريره جيت وارضيتها

عبدالله العير:

الليله انته بعيرٍ تلتغمم وتهبد=ماتنتثنّى يدينك مير ثنيتها
اللي عطتك البريره حظها منقرد=عرضتها لاهب الكنّه وخليتها

رشيد الزلامي :

الموج اشوفه طفح والبحر جاله زبد=لكنّ ذيك البضاعه وين وديتها
فزعتك عشرين واللي طاح واللي قعد=وخمخمتها في ظلام الليل واخطيتها

عبدالله العير :

حطيتها في بيوتٍ جوّدت بالعمد=وانته تباها لكنّك ماتحليتها
الله يعذبك كيف اشغلتني بالنشد=عن حرجةٍ تطلب الميته وذكيتها

رشيد الزلامي :

اقول سبحانك الخلاق فردٍ صمد=عيون فتحتها وعيونٍ اعميتها
يالعير دم الخواجه ماع مدري جمد=وارد عراوي دخل ماها على زيتها

عبدالله العير :

الله ليا راد له حاجه بليا جهد=حرّم عليك الزقاره وانت كنيتها
ماعاد عند الخواجه دم كله نفد=اتعبت رجلك على دربه وعنيتها

الزلامي :

وش رايك اعطيك بالغليون لين تهجد=تصبح وساعتك ضايعةٍ تواقيتها

تحياتي

 

[احمد الاسعدي]

اللي عطتك البريره حظها منقرد
عرضتها لاهب الكنّه وخليتهـا

هههههههههههههههههههههههههههههه




وش رايك اعطيك بالغليون لين تهجد
تصبح وساعتـك ضايعـةٍ تواقيتهـا

هههههههههههههههههههههههههههه






الله يرحم العير ويطول عمر ابو جميل

لاهنت يانايف على النقل الفريد من نوعه..

تحيتي,,,

 

[نايف بن صنهات]

شعر وبس.,

الله يرحم الميّت ويطيل بعمر الحيّ.,

وسلمت على حضورك ياأبو خليفه.,